هو انا شبح؟؟؟؟؟؟

بقالى كام يوم كده عندى احساس غريب قوى
قال ايه خير اللهم اجعله خير
حاسس ان كل الناس اللى حواليا دول هيطلعوا اشباح و ان كنت مخدوع فيهم
او ممكن انا اللى اطلع شبح فى الاخر
لو حد فيكوا كان بيقرا روايات صرخه الرعب ايام اعدادى و ثانوى هيفهم قصدى كويس

الاحساس ده بدأ يجيلى من ساعه ما اشتغلت الشغلانه السوده اللى اشتغلتها من اسبوعين تلاته كده
الشغلانه بإختصار انى بقف 8 ساعات فى المنشيه و ده اكبر مكان فى تجار فى اسكندريه
بإعتبار انى مندوب من شركه توشيبا بوزع هدايا للى بيشترى اى منتج توشيبا

حد هيقوللى ايه الرعب يعنى اللى كنت عاملهولنا من شويه فى الشغلانه العبيطه ديه

هقولك يا سيدى
هحكيلكوا بعض المواقف اللى حصلت و انت تحكموا

مش هقولك بقى على بتاع اونيكس - الزبال يعنى - اللى كان عايز ياخد شنطه الهدايا بتاعه الشغل من ورايا قال ايه كان فاكرها كيس زباله

و لا هقولك على العمال اللى فاكرين انى مختوم و الرياله بتقع منى و ييجى شايل صندوق توشيبا فاضى على اساس انى هوقفه و اديله هديه

و يا لهوى على العيال اللى بتييجى تتحايل عليا عشان ياخد هديه عيال شكلها غريب جدا منهم بنت ممكن تقول -والنبى-الف مره فى الدقيقه

ده موقف حصل النهارده مثلا
رحنا نصلى كالعاده فى المسجد الغريب اللى بنصلى فيه كل مره
هو مش مسجد اوى يعنى
هو فى ارض و مفروشه سجاد و في سماعات و قبله و امام و ناس بتصلى و كل حاجه
بس مفيهوش سقف
ايوه متفركش عينك
مفيهوش سقف والله زى مابقولك كده و مش عارف لما ييجى الشتا هيعملوا ايه
المهم
النهارده لما جيت اصلى المغرب و انا قاعد مستنى الاقامه لقيت راجل قام مسك القله - اللى الناس بتشرب منها - و قام راميها على طول ايده و نزلت ميت حته
قال ايه شكلها مش عاجبه

ده غير الراجال اللى بييجى المسجد ده كل يوم وشايل سبحه ضخمه و ازازه خضره فيها نفس منسوب الميه بتاع كل يوم و معاه فوطه ماسكها فى ايده و حاطط منديل قماش فى قفاه و متعرفش ايه حكمه ده كله

بعد ماطلعنا من المسجد شفت الست العجوزه اللى مش بتعمل حاجه غير انها رايحه فى الشارع رايحه جايه تهزر مع التجار على اساس انها ملكه جمال مصر و هى عندها بتاع 80 سنه

من يومين كده لقيت واحد ماشى عادى فى الشارع و فجأه لقيناه هاج مره واحده و فضل رايح جاى فى الشارع يضرب نفسه بالقفا بشكل هستيرى لدرجه انه كان يضرب نفسه القفا يقع فى الرض من قوته و يقوم تانى و يضرب نفسه تانى و يخبط دماغه فى عامود النور و فجأه برضه رجع لحالته الطبيعيه و مشى عادى

شكله كده فى ظابط خوزقه و طلع عينه

بعد عشرات المواقف اللى من النوع ده بحس ساعات ان الناس ديه فيها حاجه مش مظبوطه و انها هييجى يوم و الاقيهم عيونهم مدلدله و فكهم الاسفل مش موجود و يبدأ فيلم اكلى لحوم البشر

يلا ربنا يستر

على فكره البوست ملوش لزمه

ده بس عشان اخرج من حاله الانتفاخ اللى انا فيها

بس برضه عايز اشوف تعليقات

قال يعنى انا كنت مهرى تعليقات قبل كده

هو فى ايه

هى مش هتروق و تحلى بقى ولا إيه

؟؟؟؟؟؟؟؟؟؟؟؟؟؟؟؟؟

!!!!!!!!!!!!!!!!

ما بين سيدنا نوح و سيدنا محمد و إحنا

النهارده الخطيب بتاع صلاه الجمعه فى الدعاء اللى فى اخر الخطبه كان بيدعى و يقول

اللهم إنا مغلبون فإنتصر

و كررها كذا مره

و الناس تقول أمييييييييييييييين

لكن انا جاتلى خاطره غريبه شويه نويت أكتبها

الدعاء ده يا رجاله قاله سيدنا نوح و بعدها جاء الطوفان فأهلك الكفار و نجى المسلمون

واحد هيقوللى و انت عايز ايه احلى من كده

هقولك يا خويا

تعالى كده فكر معايا

سيدنا نوح دعى قومه ما يقرب من 950 سنه

ولم يسلم معه فى أكبر الاقوال 8 مسلمون

تخيلوا

إشمعنى الطوفان ييجى بعد 950 سنه تعب و نضال و بذل و تضحيه

أكيد سيدنا نوح إستنفذ كل ما يمكن من قول او فعل او ابداع او طريقه او قل ما شئت من كلام لكى يقنع قومه بفكرته

إحنا بقى عملنا ايه

طيب هو عمل كل اللى ممكن يتعمل

عشان كده لما دعا ربنا استجاب

عشان شاف منه كل ما يمكن فعله

لكن احنا

هو نفس اللى بنعمله هو هو من مليون سنه

كل ما تحصل حاجه

مظاهره

وقفه احتجاجيه

مؤتمر

بس مفيش غير كده

مفيش ابتكار فى الوسائل

اكيد فى حاجات تانيه يا جماعه

حاسس ان احنا مينفعش نقول الدعاء ده دلوقتى

عشان مانستحقش الاجابه من الله

لذلك قال سيدنا ابو بكر انه لم يرى النبى يدعوا الله على الكفار و بأن ينصر المسلمين على الكفار مثل ما فعل فى غزوه بدر

ده شان هو شاف ان المسلمين عملوا كل اللى ممكن يعملوه

اتعذبوا فى مكه

و هاجروا مرتين

و سابوا اموالهم و اهلهم

و

و

و

و

عشان كده ربنا استجاب

لازم نتغييييييير

بحبه يا بابا

عارف إن فى مليون واحد إتكلموا فى نفس الموضوع قبل كده

و عارف إنى مش هتكلم فى الموضوع ده أحسن منهم

لكن أنا عايز أتكلم يا جماعه

هى ديه مش مدونتى أنا برضه

يبقى أنا حر

الحب

..............الحب ده يا جماعه

................الحب يعنى

.................معنى كلمه حب

صحيح

هو يعنى إيه حب

يعنى لما تقول أنا بحب فلان

يبقى إيه اللى حصل

هتقولى إنك شفت منه مواقف حلوه خليتك تحبه

لأ

مش كده خالص

ساعت بنحب ناس من غير ما نسمع منها كلمه واحده

ده يطلع ايه بأه

ما هو حب برضه

طيب إزاى

أصل ما دام الحب ده شعور و إحساس من ضمن الاحاسيس التانيه يبقى لازم يكون له سبب

يعنى مثلا

إنك تكره واحد لازم تكون شفت منه مواقف منيله بستين نيله

إنك تبقى فرحان لازم يكون حصل موقف يفرحك

إنك تبقى غضبان لازم يكون فى حاجه غاظتك

أى إحساس بيبقى عباره عن رد فعل لموقف معين

إلا الحب

بييجى كده زى المطر بتاع شهر يناير

فجأه كده تبقى ماشى و السما صافيه و حلوه

و تلاقى الدش الساقع اللى نزل على نافوخك

ليه بنقعد نحب فى ناس و إحنا عارفين إنهم عمرهم ماهيحبونا زى مابنحبهم

ليه تفضل تحب فى شخص مش معبرك أساسا

بتبقى متغاظ منه اوى

لكن بتفضل تحبه اوى

تبقى حاسس انك عبيط أوى

لكن برضه بتحبه أوى

ليييييييييييييييييه

نفسى أعرف

!!!!!يا عالم يا مفتريه

الفتره اللى فاتت الناس بقت مفتريه قوى

بالذات لما الناس بتفترى على ظباط الشرطه

تصدقوا ان الراجل السباك بتاع المنصوره راح انتحر و نط من البلكونه عشان يفترى على الظابط و يقول ان هو اللى بعتله امناء شرطه يقتلوه

شوفتوا الأفترا بتاع الناس

يا سااااااااتر

ده حتى العيال الصغيره فى المنصوره برضه

الولا راح سرق و هو عنده التهاب رئوى عشان عقبال ما الظابط يمسكه يكون هو مات فى الحجز

كل ده عشان يتهموا ظابط الشرطه ان هو اللى قتله من التعذيب

شفتوا الاقترا و الظلم

لدرجة الناس بتوع واحه سيوه

اللى بنقول عليهم ناس طيبه و مالهومش دعوه بالحاجات ديه

برضه راح ولع فى نفسه ورمى نفسه على الحدود الليبيه عشان يتهمها فى الظابط

ناس عجيبه و الله

عايزينا نصدق ان فى مصر ظباط بيعذبوا الناس

مش ممكن يا جماعه

مصر هبه النيل فى ظباط بتستخدم قانون الطوارىء لمصالح شخصيه

مش ممكن اصدق ابدا

مصر الحضاره فيها ظباط بيعملوا حاجه وحشه فى الشعب كريم العنصرين ده

لالالالالالا انتوا بتقولوا ايه يا جماعه مش ممكن ابدا

طب بذمتكم حد يصدق الكلام ده

حاجه تحرق الدم

كل ما نشوف واقعه تعذيب مالهاش حل غير انها واقعه تعذيب تسمع مبررات عجيبه الشكل من وزاره الداخليه

قال الراجل اللى الناس كلها شافوا امناء الشرطه بيحدفوه من البلكونه طلع هو اللى نط من البلكونه لوحده

و الوله اللى اتعذب فى المنصوره اللى عنده 14 سنه لغايه ما مات

قال ايه كان عنده التهاب رئوى و مات لوحده

يعنى لما هو عنده التهاب رئوى كان ايه اللى مقعده فى الحجز

آآآآآآآآآآآآآآآآآآآآآآآآآآآآآآآآه يا بلد

بس اللى بيحصل ده على فكره هو اللى لازم يحصل

لو تبص فى كتب التاريخ على اى نظام من ساعه لما البشر اللى همه احنا بدأوا ينظموا نفسهم فى دول و قبائل

تلاقى ان اول ما النظام الحاكم يبدأ يذل شعبه و يحكمه بالحديد و النار

تعرف ان نهايته قربت

هى ديه سنه الحياه

بس خلى بالك

يعنى مش هنبقى قاعدين فى البيت

وتلاقى واحد بيتصل بيك و يقولك

!!!!!!!!!اااااسكت ...... مش النظام وقع

لأ

لازم يكون فى ناس اتبهدلت عشان تدافع عن حقها

ولازم تكون فى فكره ناس ضحت عشانها كتير عشان تحققها

و لازم و لازم و لازم

(وتقولون متى هو _ قل عسى أن يكون قريبا)

صدق الله العظيم

يطلع إيه عم جيفارا ده ؟؟؟

أنا مش هتكلم عن قصه حياه جيفارا

لكن أظن إن كلامى هيبقى أوضح لو عرفتوا مين جيفارا ده

اللى يعرف يخش فى المفيد على طول و يقلب الكلام اللى جاى

و لو إنى برضه أفضل انه يقرأه يمكن يلاقى حاجه مكانش عارفها

و اللى ميعرفش يا ريت يقرا الكلام اللى جاى عشان يعرف

أهو يبقى عرف حاجه تنفعه

يعنى كده كده هتقرى الكلام اللى جاى

يعنى كان إيه لزمته وجه القلب ده بس

أرنستو تشي جيفارا

ولد أرنستو تشي جيفارا عام 1928 من عائلة برجوازية أرجنتينية , ودرس الطب في جامعة بلاده الأرجنتين وتخرج عام 1952 , ومارس مهنته بين فقراء المدن والفلاحين , وطاف قبيل تخرجه من كلية الطب مع صديقه ألبرتو غراندو معظم دول أمريكا الجنوبية على الدراجة النارية , وذلك بهدف التعرف على ظروف الناس وأحوالهم وأحوال أمريكا الجنوبية بشكل عام مستجيبا لرغبته بملاقاة الشعب والإختلاط به ومساعدة الفقراء والمرضى وكان يدعو خلال جولته للإنتفاضة ضد اللاعدالة الإجتماعية والقهر السياسي , وكرس نفسه منذ ذلك الحين ثائرا أو محرضا على الثورة أو شريكا فيها حيثما أمكن ذلك , فسافر عام 1953 الى كولومبيا ليتعرف على الثورة التي كانت مشتعلة فيها وعلى أهداف هذه الثورة وأساليبها , ثم هاجر الى المكسيك وهي البلد الأمريكي اللاتيني الأكثر ديموقراطية والتي كانت ملجأ للثوار الأمريكان اللاتين من كل مكان , وصادف ان قام فيدل كاسترو في نفس الفترة من عام 1953 بالهجوم على قلعة موناكو , وفشل هجومه وسجن وحوكم وألقى دفاعا في المحكمة هو بمثابة بيان سياسي أو حتى برنامج سياسي , مما أدى بأرنستو جيفارا لأن يعجب بكاسترو ومحاولاته الثورية , ويتشوق للتعرف اليه واللقاء به , وهذا ما تحقق عام 1955 بعد ان خرج كاسترو من السجن وهاجر الى المكسيك , وقويت العلاقة بين الرجلين وخططا معا لغزو كوبا وتحريرها من الدكتاتور باتيستا جهز الرجلان حملة من 82 ثائر أقلعوا الى كوبا على سفينة غرانما " ومن يومها سميّ ارنستو جيفارا بـ تشي - رفيق " , وما ان وصلوا شواطئها حتى كشف امرهم فاشتعلت معركة بينهم وبين جيش باتيستا , ولم يسلم منهم سوى عشرين ثائرا إستطاعوا الوصول الى جبال سيرامايسترا التي تضم أفقر فلاحي كوبا , وانطلقت ثورتهم من هناك , وأخذت تحقق النصر تلو الآخر , الى ان دخل جيفارا العاصمة هافانا في اليوم الأول من عام 1959 قبل ان يدخلها كاسترو , وهرب باتيستا ونجحت الثورة الكوبية وبعد نجاح الثورة عين جيفارا سفيرا متجولا للثورة الكوبية , وزار العديد من البلدان الغير منحازة والتقى بقيادتها مثل عبد الناصر في مصر

عين جيفارا رئيسا للمعهد الوطني للأبحاث الزراعية ثم عين وزيرا ورئيسا للمصرف المركزي عام 1961 وصار الرجل الثاني بعد كاسترو , وحاول خلال السنوات الأولى لنجاح الثورة تصنيع كوبا إقتنع هو وكاسترو بضرورة انحياز الثورة الكوبية الى اليسار العالمي وعقدا تحالفا مع الإتحاد السوفياتي ثم تمتن هذا التحالف أثر أزمة الصواريخ السوفيتية في كوبا , وبعدها رأى جيفارا امكانية نجاح الثورة في بلدان العالم الثالث والبلدان المستعمرة وشارك في المؤتمر الآسيوي الأفريقي الذي عقد في الجزائر عام 1965 , والتقى قادة الثورة الجزائرية وحرض البلدان الآسيوية والأفريقية على الثورة , ومنذ ذلك الحين تعمق خلافه مع السياسة السوفييتية التي كان يراها سياسة تسوية ومساومة مع الإمبريالية , وطرح شعاره الشهير " لا حياة خارج الثورة - ولتوجد فيتنام ثانية وثالثة وأكثر " وكان يكرر هذا في كل مكان وأراد إنجاح الثورة في الكونغو ففشل , ثم ترك كل مناصبه الرسمية والحزبية في كوبا واتجه الى بوليفيا ليقود حربا شعبية فيها , آملا ان يحقق في بوليفيا ما حققه في كوبا , وفعلا أشعل الثورة في جبال بوليفيا والتف حوله بعض الفلاحين , لكن الحكومة العسكرية والجيش البوليفي كان أشد تسلحا وعنفا من باتيستا في كوبا , فحاصرته القوات الحكومية في احدى المناطق الجبلية وقبضت عليه حيا ثم قتلته وهو أسيرها يوم الثامن من أكتوبر عام 1967 ودفنته في مكان سرّي , وبعد ثلاثين عام نقل جثمانه الى كوبا ودفن فيها من جديد

عايز إيه انا بأه

تعالى وقف أى شاب من اللى ماشيين فى الشارع دلوقتى

و شد ياقه القميص أو التيشيرت اللى هو لابسه هتلاقيه بنسبه 90.99% معلق سلسله عليها صوره جيفارا

ده لو مكانش التى شيرت اللى هو لابسه هو كمان عليه صوره جيفارا

ده غير صورته اللى على كل العربيات

تعالى إسأل أى واحد من دول و قوله

مين اللى انت معلق صورته ده

هيقولك وهومناخيره هتقع من كتر القرف منك

بقى مش عارف جيفارا يا جاهل

طبعا انت هتقوم قافل بقك لأنك لو سألته يطلع مين ده يعنى إحتمال يقوم يعجنك

لكن صدقنى هتلاقيهم كلهم ميعرفوش مين جفارا ده إلا نادرا

طب إيه سبب إنتشار الصوره ديه مع انها مش حلوه اوى يعنى بإعتبار ان هيطلع واحد يقوللى انها استايل

أنا شايف ان العامل الاساسى فى انتشار الصوره ديه هو عامل نفسى

أزااااااااااى

هقولك

لو حللنا نفسيه الشباب اللى موجودين فى مصر او العالم العربى هنلاقى ان معظمهم لو مكنش كلهم مهزومين داخليا حتى لو همه مش معترفين بكده لأن كلهم عارفين ان بلدهم بتتسرق و بتتنهب و ان حكوماتهم خاينه و ان رؤسائهم عملاء

و عارفين ان الوضع ده مش هيتغير الا لما العالم ديه تغور فى داهيه

و هم نفسهم يعملوا حاجه حتى لو لسانهم اظهر غير كده من سلبيه أو مشى جنب الحيط

لكن نفسهم يشوفوا قياده تلمهم كلهم عشان يعرفوا يغيروا حاجه

بإعتبار ان النسان بفطرته بيبقى عايز قياده تحسسه انه بأمان معاها

لكن لو لوحده هيخاف يعمل أى حاجه عشان ملهوش ضهر زى ما بيقولوا

و فى ظل إختفاء القيادات ديه

أو ممكن تكون موجوده بس المشكله ان محدش عارفهم

تلاقى الناس بتنشىء لنفسها قيادات وهميه حتى لو كانت ماتت عشان يفضل عايش تحت ظلها و يستمد منها العون النفسى حتى على الاقل

يعنى تقدر تقوللى الناس ليه ايام عبد الناصر كانت حاطه صورته فى كل البيوت و لغايه دلوقتى فى ناس ماشالتش الصوره ديه

ده عشان هو عرف يجعل من نفسه قياده كاريزميه الناس تتلف حولها حتى لو كان ظالم و منتنيل بستين نيله

الناس يا جماعه متعرفش تمشى من غير قائد

حتى لو كان وهم

كل اللى ناس تعرفه عن جيفارا انه كان راجل مناضل حارب العالم عشان العدل و المساواه

بس كده

يعنى همه عايزين ايه أكتر من كده

تقدر تقول انهم نفسهم فى واحد يطلع زى ده و هتلاقيهم كلهم وراه

بس هو يطلع

و سواء كنت متفق مع افكار جيفارا او لا بإعتبار إنى إخوانجى و فكرى إسلامى و الراجل ده كان شيوعى

لكن الفكره واحده

القياده هتفضل طول عمرها قياده مهما اختلفت الافكار اللى بتتبانها

المهم انها تكون مخلصه للفكره اللى هيه متبنياها

و انها تعرف تلم الناس حواليها

يا ترى مين القائد القادم فى مصر

يعنى ايه انتيم ؟؟؟

السؤال ده محيرنى من مده طويله

الاول كده لفظ " انتيم " عشان اللى ميعرفش يعنى صاحبك اللى لازقلك على طول و اللى انت برضه بالضروره لازقله

مش عارف الكلمه ديه طلعت امتى لكن لقيها بتتقال فقلتها

المهم يا ولاد

انى قعدت مره اشوف مين اللى انا مصاحبهم فى الدنيا لقيتهم كتير

كلهم كويسين

و كلهم وحترمين

و كلهم بحبهم

وكلهم مقدرش استغنى عنهم

طيب ايه المشكله ياعم الحاج

المشكله يا سيدى ان الطبيعه تحتم على الانسان ان يكون ليه انتيم واحد بس

اه ممكن يكون ليه صحاب كتير اوى

لكن لازم يكون فى واحد بس هو اللى ممكن تقوله اسرارك اللى مش ممكن تقولها لحد تانى غيره

لازم يكون فى واحد بس هو اللى ممكن لو وقعت فى مصيبه يكون اول واحد تروحله و تكون متأكد انه هيساعدك بكل ما يملك من طاقه

لازم يكون الواحد ده برضه نفسك تقعد معاه وقتك كله من غير ما تزهق

على فكره الواحد ده ممكن يكون موجود بس المشكله انه لازم و ضرورى و لابد انه يكون بيبادلك نفس المشاعر ديه

هى ديه اكتر مشكله ممكن تكون موجوده

ممكن يكون فيه واحد انت بتحبه اوى

و لو طلب منك حاجه هتجرى و تعملها

و لو واقع فى مشكله تكون اول واحد موجود

لكن يكون هو غير كده

يكون معتبرك كأنك صاحب عادى يعنى زى اى واحد تانى

و ممكن يكون فى واحد بيحبك اوى برضه

و لو طلبت منه حاجه هيجرى و يعملهالك برضه

و لوكنت واقع فى مشكله هيكون اول واحد يقف معاك برضه

لكن للأسف رضه

يكون انت مشاعرك تجاهه انه صاحب عادى زى واحد تانى

و نفضل كده لغايه نلاقى واحد بيبادلك نفس المشاعر و الافعال

ده لو عرفت تلاقيه

تبقى محظوظ اوى

لأن ديه فى نظرى من أكبر النعم اللى ممكن ربنا يديها لحد

هو كلامى ده فى حاجه صح

ولا انا بهرتل و خلاص

يا ريت اللى عنده حاجه ينفع تتقال فى الموضوع يشرفنى بيها فى التعلقات

وبلاش بالله عليكم نظام الحب فى الله والبغض فى الله و الحاجات ديه

انا مش بقول ان الكلام ده مش موجود لا سامح الله بالعكس تماما

لكن القضيه اللى بتكلم فيها ديه بعيده تماما عن الموضوع ده

مستنى تعليقاتكم

و الله بيفلفصوا

النظام اللى احنا فيه ده بدأ يفلفص

الفلفصه ديه اللى هيه الحركات اللى بيعملها الحيوان لما ييجى يتدبح
بيبقى عارف انه هيموت هيموت
فبيعمل أعنف الحركات اللى ممكن يعملها فى حياته
لكن بتكون حركات ساذجه أوى
كل اللى بيبص عليه و هو بيتدبح عارف انه هيموت
و هو برضه عارف انه هيموت
بس تلاقيه برضه بيعمل نفس الحركات العنيفه الساذجه اللى ملهاش هدف معين
غير إنه بيلوش و خلاص

هو ده نفس اللى بيعمله النظام بتاعنا بالظبط

يعنى تقدر تقوللى ايه اللى خلاه يخطف 3 طلبه لمجرد إنهم من الاخوان
و محدش عارف طريقهم فين من شهر و على فكره الطلبه ديه اخوان عاديين جدا
يعنى مش قيادات جباره اوى يعنى

و دول عينه من اللى بيحصل فى البلد كلها

مش الاخوان بس على فكره

لكن ده نظام بقى أهبل خلاص

شفتوا عمل ايه مع ايمن نور

حتى لو كان زور و عمل اللى عمله مش من السياسه أبدا إنه يبهدل اللى نزل قدامه بالمنظر ده

ما هى مش بلد القانون أوى يعنى محدش يحاول يقنعنى بأه و يقوللى القانون لازم ياخد مجراه

أحسن هيلاقينى سخسخت من الضحك لغايه ما اموت

كان قصده ايه من اللى عمله ده بأه

انه شجيع السيما و محدش يقدر عليه

ماشى يا عم

ده غير المحاكمات العسكريه للمدنيين

اللى مبتحصلش فى اى حته فى الدنيا غير فى مصر و البلاد اللى فيها نظام عسكرى

ملهاش تفسير غير انه بيفلفص و ديه من ضمن الحركات الساذجه بتاعته

تقدر تقولى ايه النهب اللى تم اكتشافه كده على عينك يا تاجر كده من غير اى اعتبار لأى حد
فى بنك اسكندريه من كام شهر وبنك القاهره اللى أكتشفوا فيه إختفاء عشره مليارات من الدولارات أثناء عمليه البيع و مش عارفين هيه فين لغايه دلوقتى

ناقص يقولك انا اللى سرقت و اللى عنك إعمله

و
و
و
و
هقول ايه و لا ايه ما كله عارف
لكن محدش بيعمل حاجه

الشعب ده رغم كل السلبيه اللى تشل اللى متأصله فيه
لكن انا متأكد ان فيه خير

مش مبرر قوى انه تكون سلبيته ديه من القهر اللى النظام ده معيشنا فيه من 25 سنه
لكن ايا كان فاضل تكه و الشعب الجبار ده هيفور و هيثور

أول ما العيش هيغلى و ده متوقع بعد ارتفاع اسعار القمح و رفع الدعم عن الرغيف الافرنجى اللى بقى بـ 20 قرش
كل الفقراء اللى كانوا سلبيين و حجتهم انهم خايفين على أكل العيش مش هيلاقوا العيش اللى همه خايفين عليه
مش هيبقى فى حاجه يخافوا عليه

ساعتها النظام ده هيتمسح بأستيكه من على وش مصر اللى اتبهدل بسببه

بس للأسف هيكونوا سرقوا كتير أوى
فوق ما أى حد من اللى هيقروا البوست ده يتخيل
الاف المليارات

لكن مصر خيرها كتير
و كله هيتعوض
و الله كله هيتعوض
امتى مش مهم خالص
المهم اعمل حاجه عشان تبقى اسمك عملت حاجه
علشان لو اليوم ده جه و انت عايش هتندم اوى لو لاقيت نفسك معملتش حاجه عشان اليوم ده ييجى
وقت لا ينفع الندم

و الله اليوم ده جاى

اللمبى فشل يا بنى أدمين

بصوا بأه

أكاد أجزم ان من افشل الافكار انك تفكر تعمل مشروع فى البلد اللى إسمها مصر دى

مش عايز هرطقه ( حلوه هرطقه ديه ) من نوع

بلاش يأس

كل حاجه ممكن تتحقق بس انت إبدأ

السوق مفتوح بس انت حاول

انت اللى فاشل

و مش عايز حد يعيشلى دور إبراهيم الفقى و يقعد يقولى كلاكيع من نوع

بص للهدف البعيد و قسم أهداف مرحليه و فرعيه

و إنك تعمل لنفسك برمجه لغويه عصبيه و تبرمج نفسك على النجاح

و

و

و

ماشى إتفقنا

على فكره أنا مبتكلمش على المشاريع كلها

ملناش دعوه بالمشاريع اللى بالملايين

ديه يا حبيبي ليها اللى بيسندها

الكروش الواسعه ياااااااااااامه

ديه الحاجه الوحيده اللى عندنا منها فائض ممكن نصدره بجانب الحشيش

أنا بتكلم انك تعمل مشروع من شبه الصفر بإعتبار إن مفيش حد يعرف يبدأ من الصفر

يعنى أوعى تفكر و توهم نفسك إن انت لو فكرت أوى و عملت دراسه جدوى محترمه و بدأت هتعمل حاجه

انسى يا معلم

طول ما إنت فى البلد ديه إنسى

أقولك ليه؟؟؟

أقولك .......

مصر فيها مشاكل لا حصر لها و لا عد فى الاقتصاد و كلها مشاكل مكلكعه بشكل لا تتخيله

بدون الخوض فى تفاصيل هذه المشاكل

خلاصتها إن فى مصر متعرفش تعمل مشروع صغير و ينجح و يكبر لعده اسباب

أكبرها أو اهمها

ان من كتر إن الوضع ضيق أوى تلاقى الناس كل ما تلاقى فكره جديده لأى مشروع و صادف و نجح

تلاقى كل اللى معاه قرشين فى البلد راح عمل نفس المشروع ده

لغايه ما كل المشاريع ديه تفشل لأنها مش لاقيه عملاء على حسب نظريه العرض و الطلب

على سبيل المثال

لما واحد عمل فكره المحل اللى بيبيع كل حاجه بسعر واحد مثل (كل حاجه ب 2.5 )

كان فكره جديده و كويسه و نجحت نجاح كبير

لكن كل اللى معاه قرشين قام اشترى محل و جاب شويه منبهات على دباديب على لعب أطفال و عمل نفس الحكايه

فلا ده يعرف يبيع و لا التانى يعرف يبيع و كلهم يقفلوا فى الاخر

و برضه أول ما طلع فكره السيبر كافيه

كان ناجح فى الاول و كويس

لكن تلاقى بعد كام شهر كل الشوارع فيها بين كل سيبر و سيبر سيبر تانى

فلا ده يشتغل و لا ده يشتغل و يقفلوا كلهم فى الاخر

و نفس الموضوع فى السنترالات و و و و و و و

نوع من الغباء رهيب

هو فى حد فى الدنيا يفتح سيبر فى شارع 100 متر و نفس الشارع ده فى 3 سيبرات

والله حصل فى شارعنا

لمجرد انه سمع انه مشروع كويس

ماحاولش حتى يعمل دراسه جدوى

فالطبيعى انه يقفل هو و اللى جنبه

يعنى قطع عيشه و عيش التانيين معاه

لكن ارجع و أقول السبب فى الازمه الاقتصاديه اللى احنا عايشنها فى عصر

الهاى هىء حسنى و جيمى ربنا ياخدهم فى يوم واحد قادر ياكريم

الناس ما تصدق تلاقى فتحه هوا كلهم يجروا عليها لغايه ما يسدوا الفتحه و يرجعوا تانى محلك سر

ديه تعتبر مقدمه لتجربتى الفذه فى مجال المشاريع الصغيره

البوست الجاى إن شاء الله

الفقر فقر

" مالها منحسه معايا كده ليه النهارده "

" ده يوم مطلعتلوش شمس "

" إيه اليوم الفقر ده "

كلها جمل ممكن تقولها لو حسيت ان اليوم ماشى مش مظبوط

ممكن يكون اليوم عادى جدا

لكن انت حاسس ان العمليه مش ماشيه خالص

اقولك بعض الامثله من ضمن الاف الامثله اللى بتحصللى بإنتظام مقرف

يعنى مثلا لما تكون واقف فى موقف و عايز تركب ميكروباص تحصل بقى حاجات عجيبه

ان مثلا الميكروباص عمره ما يقف ادامك ابدا كأن السواقين كلهم متفقين عليك " والله ما هيركب النهارده "

و لو رحت وقفت فى المكان اللى لاحظت ان كل الميكروباصات بتقف تحمل منه

تلاقيهم بسرعه رهيبه حولوا مكان الوقوف فى نفس المكان اللى انت كنت واقف فيه من شويه

و هكذا حتى تقارب مرارتك على الانفجار و تركب تاكسى احسنلك "الواحد معندوش غير مراره واحده

يا سلام بأه لو قررت تركب القطر

طبعا مش هحكيلك على الزحمه الرهيبه كيوم الحشر

غير ان لازم يكون فى نص ساعه على الاقل بين كل قطر و قطر كأن مفيش غير قطر واحد هو اللى عمال يلف

الفقر فى ايه بأه

انى كل ما اجى اركب القطر يكون القطر اللى عايز اركبه لسه طالع من المحطه حالا معرفش ليه

بعد ما القطر اللى بعديه ييجى تكون مرارتى اتفقعت خلاص من الحر و الزحمه

قال ايه الاقى الباب الوحيد اللى مقفول فى القطر كله هو اللى جه ادامى لما القطر يقف

تعالى بأه نشترى اى حاجه من اى حته

لازم و لا بد تكون الحاجه اللى عايز اشتريها لسه خالصه من عنده حالا

لو عايز اخلص اى ورقه من اى حته فى البلد

لازم برضه يكون الموظف تكون مراته بتولد او امه ماتت و مجاش

لو عايز اتفرج على برنامج معين فى التليفزيون

لازم الوصله تقطع لأول مره من شهر و مترجعش غير مع التتر بتاع نهايه البرنامج

عارفين اول ما قررت استغنى عن وصله النت و اجيب" الدى اس ال " خاص بيه على خط التليفون بتاعى

الحراره قطعت لمده 3 اسابيع و السنترال ذات نفسه مكنش عارف العطل منين

و بمناسبه التكنلوجيا مقدرش انسى جمله " لقد نفذ رصيدكم " الشهيره لما تيجى تعمل مكالمه مهمه مع انك عمرك ما تسمعها فى كل المكالمات اللى ملهاش لزمه

ولما جه عميد الكليه يصدر قرار ان سنه تالته ورابعه هيبقوا 10 مواد بدل 15 ماده

ماحبكش معاه يصدر القرار الا فى السنه اللى اتخرجت فيها و طبعا متطبقش علينا

هتسألنى ليه لم تطبق على الفرقه بتاعتنا

عشان انا فقر

بذمتكم فقر ولا مش فقر