السؤال ده محيرنى من مده طويله
الاول كده لفظ " انتيم " عشان اللى ميعرفش يعنى صاحبك اللى لازقلك على طول و اللى انت برضه بالضروره لازقله
مش عارف الكلمه ديه طلعت امتى لكن لقيها بتتقال فقلتها
المهم يا ولاد
انى قعدت مره اشوف مين اللى انا مصاحبهم فى الدنيا لقيتهم كتير
كلهم كويسين
و كلهم وحترمين
و كلهم بحبهم
وكلهم مقدرش استغنى عنهم
طيب ايه المشكله ياعم الحاج
المشكله يا سيدى ان الطبيعه تحتم على الانسان ان يكون ليه انتيم واحد بس
اه ممكن يكون ليه صحاب كتير اوى
لكن لازم يكون فى واحد بس هو اللى ممكن تقوله اسرارك اللى مش ممكن تقولها لحد تانى غيره
لازم يكون فى واحد بس هو اللى ممكن لو وقعت فى مصيبه يكون اول واحد تروحله و تكون متأكد انه هيساعدك بكل ما يملك من طاقه
لازم يكون الواحد ده برضه نفسك تقعد معاه وقتك كله من غير ما تزهق
على فكره الواحد ده ممكن يكون موجود بس المشكله انه لازم و ضرورى و لابد انه يكون بيبادلك نفس المشاعر ديه
هى ديه اكتر مشكله ممكن تكون موجوده
ممكن يكون فيه واحد انت بتحبه اوى
و لو طلب منك حاجه هتجرى و تعملها
و لو واقع فى مشكله تكون اول واحد موجود
لكن يكون هو غير كده
يكون معتبرك كأنك صاحب عادى يعنى زى اى واحد تانى
و ممكن يكون فى واحد بيحبك اوى برضه
و لو طلبت منه حاجه هيجرى و يعملهالك برضه
و لوكنت واقع فى مشكله هيكون اول واحد يقف معاك برضه
لكن للأسف رضه
يكون انت مشاعرك تجاهه انه صاحب عادى زى واحد تانى
و نفضل كده لغايه نلاقى واحد بيبادلك نفس المشاعر و الافعال
ده لو عرفت تلاقيه
تبقى محظوظ اوى
لأن ديه فى نظرى من أكبر النعم اللى ممكن ربنا يديها لحد
هو كلامى ده فى حاجه صح
ولا انا بهرتل و خلاص
يا ريت اللى عنده حاجه ينفع تتقال فى الموضوع يشرفنى بيها فى التعلقات
وبلاش بالله عليكم نظام الحب فى الله والبغض فى الله و الحاجات ديه
انا مش بقول ان الكلام ده مش موجود لا سامح الله بالعكس تماما
لكن القضيه اللى بتكلم فيها ديه بعيده تماما عن الموضوع ده
مستنى تعليقاتكم
6 comments:
بص يا كيمو .. انت تقريبا معاك حق في كل اللي قلتة يعني فعلا لما يكون فية واحد بس تقضي وقتك معاه وتقولة كل اسرارك ولما تكون مخنوق اول واحد تفكر فية ولما تحصل لك حاجة حلوة او موقف كوميدي تفضل تدور علية علشان تشاركة اللحظة دي ولو مش موجود تكون تقريبا متوقع رد فعلة .. كل دة شيء راااااائع ان يكون ليك واحد زي دة وانا رايي ان الواحد لو لقي واحد زي كدة مايفرطش فية مهما كان .. بس من ناحية تانية ان ممكن يكون ليك اكتر من انتيم يعني ممكن تكون الشلة كلها انتيم .. بمعني انة تكون في الشلة دي كل الحاجات المشتركة اللي قلناها فدة بيكون برضة راااااائع ..م الاخر هي بتكون علي حسب الشخص ولو لقي الشخص الحاجتين دول يبقي حاجة فل قوي سلااام .. الشنواني
الحقيقة انا شايف الموضوع ده مهم جدا لكن يصعب قياسه .. يعني خلال خبراتي البسيطة .. مكن يكون في انتيم خلال فترة دراسة معينة (( انتيم بجد او صاحب بجد .. او اخوة حقيقة مش كلام كتب )) او انتيم حياة وده بيكون نادر مش لاي حد ونعمة من نعم ربنا ..
لكن الاهم من كده .. مش الانشغال بمن هو الانتيم واين هو الانتيم .. لا ... الانشغال الحقيقة هو طرية معاملتي للي انا بحبهم او للي قريبيين مني (( ودي دايرة اوسع من الانتيم )) وعلى اساس المعاملة دي بينجذب ليك اشخاص ويقتربوا منك وفقا لمعاملتك .... ونتيجة تبادل المشاعر العملية والحرص الحقيقي مع الدايرة الواسعة دي .... حينتج انتيم حتى لو كنتم مختلفيين في الافكار والعادات..
كنت مرة قرات حاجة اسكها بنك المشاعر .. يعني زي ما انت عايز من اصدقائك لازم تودع عنهدهم في بنك المشاعر رصيد ... علشان تقدر تسحب منه الي انت عايزه وبلا حدود وعلى قدر ما تحط في البنك ده (( مع ناس مخلصة طبعا )) على اد ما ممكن تسحب منه
أنا فعلا شايف ان الموضوع ده من أصعب الأشياء اللى ممكن يعدي الإنشان العاقل عليها في حياته لأن هناك مجموعة من الناس ميعرفش يعني إيه صاحب .. يعني إيه حبيبي .. ميعرفش قيمة الموضوع ده أصلا في حين إن النبي قال " المرء على دين خليله فلينظر أحدكم من يخالل " ده أمر يا جماعة معني كدة إن التأني في إختيار الصديق مطلوب ومعنى كدةإنه حاجة صعبة فعلا انك تلاقي واحد يبادلك الشعور وتقوله كمان على أسرارك وزي ما كيمو قال دي نعمة ومن أعظم النعم اللى ربنا ممكن يديها لعباده طيب ممكن واحد تطلع بتحبه ويحبك لكنه مش متخيل يعني إيه أسرار ممكن يقول لده وده وعادي وإيييييييييه كل ما يقول لحد يقوله متقولش لحد عشان ده فلان قالي سر وهكذا فبصراحة أنا شايف ان الموضوع واسع أوي في ظل إنك عايش وسط ناس بتنظر نظرات مادية والمشاعر دلوقتي مبقتش حلوة والح مبقاش حب يا جماعة في صحاب بيسيبو بعض عشان موقف ولا اتنين ده لو عشرة عمري مسيب صحبي طلما حبيته أنا رأيي كل واحد يبدأ بنفسه ويكون هو الشخص المناسب وبقربه من ربنا وبدعائه أكيد حيمن عليه بالنعمة دي ومعلش طولت عليكو
أنا من السعودية و ما كنت أعرف معنى كلمت أنتيم لكن سمعتها في فلم مرجان أحمد مرجان من بطولة عادل امام ، قلت لازم أدور على المعنى علشان أفهم الكلمة كويس قبل ما استعملها.
أنا شخصيا كان أنتيمي صديق يكبرني بثلاث أعوام تعرفت عليه و أنا في المرحلة الجامعية و أكتشفنا أنا نحمل مفاهيم صداقة موحدة
و أصبحنا أخوين أكثر من أشقاء ولما تزوجت و جاني ولد سميته بأسم صديقى هذا لشدة تعلقي به.
فهل هذا أنيمي ؟
تحياتي
طيب بص بقا لو فى حد بتحبة اوى وانت معتبرة صديقك وبتحبة اوى وعايز تفضل معاه علطول واما تبقى معاه بتكون مبسوط اوى اوى ممكن تحكيله على اى حاجة فى الدنيا ومستعد تسمعه يوم كمان وتخدمه بعنيك وهو كمان بيحبك بس مش زى مانت بتحبة يعنى انا بحبة اكتر بس المشكله انا ساكنة فى بلد وهو ساكن فى بلد تانية وصعب اننا نشوف بعض دلوقتى كتير عشان ظروف اتغيرت نعمل ايه بقا وكمان انا بنت وهو ولد واحنا عيشين فى مجتمع ميؤمنش بالصداقة بين الولد والبنت وليه منعرفش مع ان انا بحبة اوى كاعز اصدقائى ومش ممكن اتخيلة حاجة غير اعز اصدقائى ايه الحل بليز i need answer sara
انا شايف الحل الوحيد لولد و بنت بيحبوا بعض و مش طايقيين يبعدوا عن بعض و نفسهم يعيشوا مع بعض على طول انهم يتجوزا و يعيشوا مع بعض للأبد
فعلا مفيش حاجه اسمها صداقه بين ولد و بنت يا ساره
الصداقه لازم تكون من نفس الجنس يعنى ولد مع ولد او بنت مع بنت
لكن بنت مع ولد مش حرام يحبوا بعض لن حرام تكون علاقتهم خارج نطاق الارتباط و الجواز بمعرفه الاهل و ده شرع ربنا و تعليمات رسولنا محمد اللى احنا بنحبه
صلى الله عليه و سلم
اتمنى تكون اجابتى ريحتك و لو مريحتكيش قوليلى و نتناقش مش مشكله
Post a Comment